Mellores cancións do século XXI en galego

Este trimestre estivemos a preparar un proxecto sobre a música galega en colaboración co Departamento de Galego no que pretendemos escoller as 10 mellores cancións orixinais de diferentes artistas do século XXI.

As bases deste proxecto contemplan dous aspectos: os temas serán orixinais, é dicir, non valerán versións de cancións alleas, e cada artista só poderá ter unha canción na fase final. Non valen, polo tanto, cancións como "A Carolina" "A rianxeira" ou "Catro vellos mariñeiros", nin tampouco as de "Chandelier" ou "Jalando" xa que son versións libres doutros temas (poderán ser parte doutro "concurso" noso no futuro)

O proxecto conta con dúas fases: na primeira fase puidéronse propoñer nas clases de galego cancións de artistas diferentes. Calquera estilio musical era válido. Logo de facer as propostas, escollemos ata tres cancións por grupo ou solista para poder votar na fase final.

Destes temas finalistas só se pode escoller unha canción de cada artista e poderanse votar ata 10 artistas diferentes.

As cancións  finalistas para votar resultaron as seguintes (artista, canción e enlace para ver-escoitar):

Ataque Escampe: "Arder"
https://www.youtube.com/watch?v=dGJ46VjPhm4&list=PLDFQZaLF_5thFqnJeDrpIWAM-TwRRVtJt

Ataque Escampe: "Misión de Audaces"
https://www.youtube.com/watch?v=oIPmk7X_nZA&index=3&list=PLDFQZaLF_5thFqnJeDrpIWAM-TwRRVtJt

Ataque Escampe: "Pel de serpe"
https://www.youtube.com/watch?v=lEoS7u8xQ3o&index=21&list=PLDFQZaLF_5thFqnJeDrpIWAM-TwRRVtJt

Berrogüetto: "Hepta"
https://www.youtube.com/watch?v=8dB5vUb0wCk

Berrogüetto: "O preciso movemento"
https://www.youtube.com/watch?v=Sn8UP1JKJ0M

Berrogüetto: "Xente"
https://www.youtube.com/watch?v=bl6EACZmMsU

Dakidarría: "Terra"
https://www.youtube.com/watch?v=ZngKOuwbDzs

Dakidarría: "Mil berros"
https://www.youtube.com/watch?v=xKp6EdqmCcI

Dakidarría: "A mocidade activa"
https://www.youtube.com/watch?v=CWD3YIFY6ds

García Mc (do colectivo Dios ke te crew): "Abaixo e de pé remix"
https://garciamc.bandcamp.com/track/abaixo-e-de-p-croma-remix-2

García Mc (do colectivo Dios ke te crew): "Amor e sangue en chiapas"
https://garciamc.bandcamp.com/track/amor-e-sangue-en-chiapas-paino-remix

García Mc (do colectivo Dios ke te crew): "Rúa Abaixo remix"
https://garciamc.bandcamp.com/track/r-a-abaixo-hevi-remix

Guadi Galego: "Chea de vida",
https://www.youtube.com/watch?v=2UuEXPq4EMI

Guadi Galego: "Matriarcas"
www.youtube.com/watch?v=VSuS_pdCvSE

Guadi Galego: "Mergullei"
www.youtube.com/watch?v=MWQ2yTysBUE

Herdeiros da Crus: "A duquesa de Poi"
https://www.youtube.com/watch?v=WgVM8eE54vQ

Herdeiros da Crus: "Buscando a Superfama'"
https://www.youtube.com/watch?v=NmVFSds4k5k

Herdeiros da Crus: "Non che teño medo"
https://www.youtube.com/watch?v=VQ9muAx__iY


Lamatumbá: "Ai Dolores"
https://www.youtube.com/watch?v=F9IlMIKTLQM

Lamatumbá: "O espertador (Non tés corazón)"
https://www.youtube.com/watch?v=ZTo6iZKgGZQ

Lamatumbá: "Reggae dos mariñeiros"
https://www.youtube.com/watch?v=YLF9VS3aMZQ


Luar na Lubre: "Memoria da noite"
https://www.youtube.com/watch?v=EZU3XqtrwG0

Luar na Lubre: "Os animais"
https://www.youtube.com/watch?v=Koe9NAby8Vs

Luar na Lubre: "Ecos do alén"
https://www.youtube.com/watch?v=q3TKXZEdM_g&list=PLx10nwpLt54zpRe2Xzy_PKj4DqkcxD7NT&index=12


Nao: "Je veux"
https://www.youtube.com/watch?v=A0mWt3XTU_o

Nao: "Desexos"
https://www.youtube.com/watch?v=P8GvgsgHPbY

Nao: "Venceremos nós"
https://www.youtube.com/watch?v=tmSS4oJtJWI


O Sonoro Maxín: "Catacúmbia"
https://www.youtube.com/watch?v=QStXHoKlVIk

O Sonoro Maxín: "Stou feliz"
https://www.youtube.com/watch?v=rOA3IO_0nIg

O Sonoro Maxín: "A rúa do perigo"
https://www.youtube.com/watch?v=ibv9g0eJ5Hs

Ruxe-Ruxe: "Buratos"
https://www.youtube.com/watch?v=jDA9de9VSOU

Ruxe-Ruxe: "Soños"
https://www.youtube.com/watch?v=dGIhI0e7frc

Ruxe-Ruxe: "Terceira guerra"
https://www.youtube.com/watch?v=VSpy8XGx-V4

Sacha na horta: "Biocultivos"
https://www.youtube.com/watch?v=Atyajq-yT3A

Sacha na horta: "Galiza chamiza"
https://www.youtube.com/watch?v=Khj-rgfbRB8

Sacha na horta: "Horta revolution"
https://www.youtube.com/watch?v=UGBZBgv0WJY


Sés: "Algo que me anime"
https://www.youtube.com/watch?v=Zo4NPolAb9s

Sés: "Co xenio destrozado"
https://www.youtube.com/watch?v=aB6bcT_YvUo

Sés: "Tempestades de sal"
www.youtube.com/watch?v=81fcyIOvnP0

Som do galpom: "Baila"
https://www.youtube.com/watch?v=XkORi0ZC6R8

Som do galpom: "Inconforme"
www.youtube.com/watch?v=dQMKEeXubrQ

Som do galpom: "A piques de estoupar"
https://www.youtube.com/watch?v=xzpIFdnS500


Zënzar: "Caneando ruainas"
https://www.youtube.com/watch?v=PQwuGiUk_JU

Zënzar: "Todo vai ben"
https://www.youtube.com/watch?v=umBr9VGRIPE


Na seguinte fase imos votar as 10 mellores cancións en galego do século XXI de entre as finalistas (só unha por artista). Cada persoa poderá votar a decena de temas que máis lle gustan e as 10 máis votadas serán as que publicaremos no seguinte artigo.

Participación nos actos da Letras Galegas do Concello

Este domingo 15 de maio participamos nos actos de homenaxe a Manuel María celebrados na auditorio de Portas e organizados pola Concellería de Cultura.
Despois da actuación da obra Barriga Verde participamos integrantes do EDLG e do club de lectura na lembranza do autor lugués.

Comezamos coa actuación do Club de Lectura de Primaria que lembrou a súa vida en tres actos (Infancia, Mocidade e Madurez) e logo o Club de Lectura "As Portadas" en conxunto cos do EDLG de Secundaria realizou un recital con poemas do autor de Outeiro de Rei.

Logo déronse os premios do concurso "Cóntame un conto, veciño" e despediuse o acto coa actuación de "Os Alegres", unha banda de gaiteiros.

Foi todo un pracer participar nos actos das Letras Galegas deste ano.

Celebración das Letras Galegas 2016 no CPI Domingo Fontán

Este venres 13 de maio realizamos os actos de homenaxe a Manuel María no CPI Domingo Fontán. O autor lugués ten dedicado o ano das Letras Galegas para lembrar todo o seu legado que foi moito e variado (poesía, teatro, narrativa, ensaio,...)

No noso centro agasallamos a súa memoria comezando cun recitado de Educación Infantil. Logo demos paso á actuación do Club de Lectura de Primaria que lembrou a súa vida en tres actos (Infancia, Mocidade e Madurez). Como tiñamos algúns problemas cos micros rematamos a obra un pouco precipitadamente e como andabamos xustos de tempo non fixemos o recital de poemas preparado polo alumnado do club de ESO e do EDLG.

(Pódense ver máis fotos das actuacións no blog do club de lectura: http:// asportadas.blogspot.com)

Finalmente demos os premios aos finalistas no concurso de microtextos que presentamos á VII edición de Terras do Umia. Os premiados e premiadas quedaron moi contentos e contentas cos seus agasallos.
Sección de Microcracións
Categoría A: participou toda Infantil (recollen o premio as persoas encargadas do grupo)

3-4 anos

4-5 anos

5-6 anos

Sección de Micropoemas

B1 (1º e 2º de Primaria)
Sofía

B2 (3º e 4º de Primaria)

 B3 (5º e 6º de Primaria)
Sheila
Ángeles

C (ESO)
Óscar
Celeste

 Microrrelatos

B1 (1º e 2º de Primaria)

 B2 (3º e 4º de Primaria)
Nuria

B3 (5º e 6º de Primaria)
Nayara
Mariña

 C: ESO
Marcos Ruibal
Daniel

 D: Adultos
Ramón Santalla (Moncho)

Finalmente despedímonos e case nos encamiñamos a gozar da ponte das Letras Galegas...

eXPoSiCióN dE LiBRoS dE MaNueL MaRía

Na entrada da biblioteca tivemos unha pequena exposición con obras de Manunel María que temos no centro. Sempre é unha boa ocasión para lembrar a un dos máis fecundos escritores das nosas letras, pero neste caso destaca porque se lle dedica o ano ao escritor de Outeiro de Rei.

Actuación de Cándido Pazó

Este xoves 12 de maio actuou no noso centro Cándido Pazó. O contacontos de orixe viguesa fixo gala do seu habitual ton irónico ao tempo que nos contou historias que teñen sempre unha mensaxe final de solidariedade ou de lembranza de quen somos e de onde vimos

Carteis das Letras Galegas

Entramos na Semanas das Letras e xa levan uns días colocados os carteis das Letras Galegas. Estes días xa estivemos a ver grupos de alumnos e alumnas facendo fichas e actividades xunto aos carteis. Nas clases de Lingua Galega comezaron a falar das Letras e tamén a lembrar quen foi Manuel María.

VII Festa da Lingua comarcal "Terras do Umia"

Este venres 6 de maio de 2016 participamos na VII Festa da Lingua que se celebrou na azucreira de Portas. Case 300 integrantes da comunidade educativa da comarca xuntáronse no noso concello entre as 11 e as 13 horas (do CPI de Portas foron 2º e 5º de Primaria e 2º B de ESO). O acto estivo organizado pola coordinadora comarcal “Terras do Umia” (formada por integrantes dos Equipos de Dinamización da Lingua Galega dos centros educativos de Barro, Cuntis, Caldas, Moraña e Portas).

Exposición da microcreación de Educación Infantil de 5 anos

Exposición da microcreación de Educación Infantil de 6 anos

Na Festa entregáronse os premios do concurso de microrrelatos e micropoemas ás gañadoras e gañadores comarcais, que leron os seus textos galardoados durante diferentes fases do acto. O xurado foi unha das autoras máis prometedoras da narrativa galega, Andrea Maceiras, gañadora do prestixioso premio Jules Verne 2015 co libro Europa Express. A xove escritora coruñesa conta, tamén cos galardóns como o premio Meiga Moira, o premio Fervenzas Lieterarias ou o 1º Premio no certame de micronovela do concello de Soutomaior. A autora non puido estar presente para a entrega dos premios pero enviou un vídeo para felicitar aos participantes. Nesta edición houbo preto dun cento de finalistas, se ben a participación se multiplicou na fase previa de selección nos centros na que participaron varios centos de escolares desde infantil ata bacharelato. As premiadas e premiados levaron como agasallos obras literarias en galego.

Sofía Villadeamigo, gañadora da categoría B1 de micropoemas

Alejandra Sánchez, gañadora da categoría B3 de micropoemas

Daniel González, gañador da catería C de microrrelatos

Outro dos actos da festa foi o concurso de canción en galego “Sondoumia” no que houbo 6 actuacións en directo, 3 de primaria e 3 de secundaria. O xurado desta edición foi “Amós” Varela, batería do grupo Nao, que vén de publicar o seu novo traballo Soñar Crear. O grupo estradense é xa unha referencia do rock actual en galego pois xa teñen practicamente unha década ás costas cantando en galego, en concreto o seu primeiro traballo é de 2007, As palabras espidas.  Entre todas as actuacións subiron ao escenario arredor de 40 estudantes comarcais para engaiolar coas súas músicas e letras en galego, que foron desde estilos máis tradicionais ata outros máis rockeiros. O premio para cada unha das bandas que foron elixidas é a gravación dun tema nun estudio profesional.

Gañadoras do concurso Sondoumia de Primaria actuando co xurado

Actuación de Secundaria durante o concurso de Sondoumia

Gañadores de Secundaria actuando ao final coa colaboración do xurado

Antes de finalizar o acto tamén se fixo entrega do diploma “Lingumia” que acredita a unha entidade pública ou privada como usuaria activa do galego. Este ano, a coordinadora “Terras do Umia” decidiu outorgalo ao ámbito xurídico e o gañador foi o Xulgado de instrución número 1 de Caldas de Reis; acudiu ao acto de recepción do diploma a titular do xulgado Encarnación Dasi Dorelle e a secretaria xudicial como parte do equipo que participa activamente na promoción do noso idioma nun ámbito no que precisa máis pulo aínda o galego.

A coordinadora de Equipos de Dinamización da Lingua Galega valora moi positivamente o acto, agradecendo unha vez máis a alta participación nos concursos e o interese mostrado polo alumnado para a asistencia a unha actividade que se consolida ano tras ano.

dÍA dO LibrO, TAmÉN eN gALEGo

Este venres 22 de abril celebrouse no noso centro o Día do Libro. Xa viñeramos facendo algunhas actividades como a presentación do libro Fontán e nesta xornada realizamos unha actividade que consistiu en anotar por cousas a obra que máis lle gusta a cada persoa en galego.

As máis citadas foron: Tonecho de Rebordechao, Unha estrela no vento, O corazón de Xúpiter, tamén apareceron obras que non son de lectura "obrigatoria" na materia de LG; así apareceu A praia dos afogados

iNTERCAMBIo e eXCURSIÓn con sAN sADURNIÑo

Durante este curso estivémonos carteando en 3º e 4º de ESO co CPI de San Sadurniño. A finalidade desta actividade estaba pensada para acabar coñecéndonos e interactuando alumnado de dúas realidades dialectais distintas (Portas, do bloque occidental, e San Sadurniño, do bloque central).

Este xoves 21 de abril visitamos o CPI de San Sadurniño e algunhas partes do seu concello. Despois de chegar ao centro achegámonos ao Castelo de Moeche. Case 100 persoas visitamos esta propiedade que foi dos Osorio e que resulta destacada por ser atacada polos Irmandiños no século XV.

Logo fomos xantar ao parque do río. Na sobremesa tivemos un tempo de lecer para coñecernos un pouco mellor.

 Ás 16.00 horas nas que visitamos a Casa da Marquesa que é a actual Casa do Concello despois dunt traballo de rehabilitación que se fixo nos últimos anos.

Finalmente regresamos para a casa despois dun intenso día de intercambio e convivencia co alumnado de San Sadurniño esperando que veñan a Portas. A ver se se animan

Presentación do libro Fontán de Marcos Calveiro

Este martes 12 de abril presentouse no auditorio da Azucreira de Portas o libro Fontán, do escritor de orixe vilagarciá Marcos Calveiro. A obra, gañadora do premio Repsol de Narrativa Breve 2015, está publicada pola editorial Galaxia e está a ser presentada por diversos lugares da xeografía galega. Como non podía ser menos, presentámola tamén para os grupos de ensino da comarca Terras do Umia.
A este acto, no que colaborou a coordinadora de EDLG Terras do Umia, asistiu alumnado do CPI Domingo Fontán de Portas, do IES de Barro e do IES Aquis Celenis de Caldas de Reis. A maioría dos máis de 200 escolares que estiveron na presentación pertencían á ESO, agás un grupo de 6º de Primaria e que en breve esperemos que sexan alumnado ESO.
O autor, que naceu en Vilagarcía de Arousa e se interesou por este personaxe que tamén naceu na súa comarca natal, falou con amenidade para o público asistente e comentou a importancia do persoeiro que recreou no libro.

Esta obra recrea parte da vida do profesor, matemático, deputado e xeógrafo portense Domingo Fontán, elaborador do primeiro mapa científico de Galicia e considerada unha das mellores cartas xeométricas da época, traballo só igualado pola cartografía inglesa e francesa que as facían como empresas de estado, mentres a medición galega foi feita polo mestre de Portas  durante 17 anos como unha tarefa case exclusivamente individual coa idea de servir como base para a mellora viaria e económica galega.

Nesta obra, ambientada fundamentalmente no século XIX, aparece a comarca do Umia como base para a crianza de Domingo Fontán, ademais das visitas familiares a Porta do Conde que facía cando estudaba en Compostela. Tamén aparecen outros localizacións xeográficas tanto galegas como europeas.

Ao final do acto o alumnado falou co escritor, preguntáronlle pola obra e algúns achegáronse para que lles asinasen un exemplar da obra.

Charla sobre Domingo Fontán de Braulio Mondrgagón

Este martes 29 de marzo tivemos unha charla sobre o profesor, matemático, científico, astrónomo, político, industrial e xeógrafo Domingo Fontán.

A charla realizouna Braulio Mondragón, integrante e directivo da Asociación Domingo Fontán e bo coñecedor da vida do egrexio portense.

Na charla falouse sobre a súa vida profesional como catedrático de matemáticas na Universidade de Santiago de Compostela, director do Observatorio Astronómico de Madrid, rexedor da fábrica de papel de Lousame, deputado nas Cortes de Madrid e, por suposto, do seu labor como realizador do primeiro mapa "científico" de Galicia.

Fontán realizou un mapa durante 17 anos percorrendo os camiños, medindo desde outeiros ata vales, triangulando desde as montañas ata as costas, para facer unha obra que servise nun futuro de base real para a mellora da rede viaria de Galicia. Na actualidade apenas se observan dous segundos de diverxencia coas medicións feitas vía satélite.

Esta experiencia é o primeiro chanzo para o recoñecemento deste ilustre persoeiro da cultura galega que celebrará o seu día grande o domingo 17 de abril, centenario do seu nacemento (este ano coincide a data do seu nacemento en domingo polo que os actos se celebrarán o día propio)

Ledicia Costas no CPI de Portas

A escritora viguesa Ledicia Costas estivo este martes 15 de marzo no noso centro.

A autora falou para o alumnado de ESO en dúas quendas. Unha primeira para 1º e 2º de ESO e unha segunda para 3º e 4º de ESO.






A narradora olívica realizou primeiro unha pequena charla co alumnado de 1º e 2º de ESO (aproximadamente das 12.30 ás 13.10) para falar das obras Escarlatina, a cociñeira defunta e Unha estrela no vento. O diálogo coa escritora foi fluído e os escolares preguntáronlle sobre os seus finais tráxicos, en que se inspira para escribir, que hai de verdade nos seus libros, que modelos da realidade seguiu ou por que trata certos temas.

A galardoada co premio nacional continuou cunha charla para 3º e 4º de ESO (13.10 a 13.50 aproximadamente) para falar dos libros que leron, respectivamente, neses cursos: Unha estrela no vento e O corazón de Xúpiter.. Ledicia amosounos unha proxección dunha moza canadense acosada para explicar por que os seus finais son tráxicos moitas veces, xa que pretende advertir que a realidade é dura e perigosa moitas veces. Deseguido estableceuse un diálogo con preguntas que resultou moi entretido.

O acto rematou cunha sinatura de obras por parte da autora que asinou tanto para a quenda de 1º e 2 como posteriormente aos de 3º e 4º. Esta escritora, unha das preferidas dos adolescentes, conquistounos coa súa sinxeleza, claridade e honestidade á hora de explicar como escribe. Ao final un grupo de alumnas quixeron fotografarse con ela.

Agradecemos a presenza de Ledicia Costas no noso centro que nos axudou a comprender mellor aínda as súas obras e por que escribe como escribe. Observamos que parte moitas veces de situacións ou personaxes reais para logo desenvolver un conflito que logo ficciona para extraer unha conclusión. Os seus libros resultan ademais didácticos porque reflexiona sobre os actos e as consecuencias e ademais adoita presentar algunhas doses de humor na súa escrita.