25 ene 2016

cARTEO eNTRE pORTAS e sAN sADURNIÑO

Esta semana comezou o carteo de Portas con San Sadurniño. Comezamos nós escribindo á volta das vacacións e agardamos que en breve nos respondan. Nunha época na que usamos a linguaxe escrita acotío nas mensaxes electrónicas persoais (móbil, tablets, computadores), facemos un salto no tempo e vemos como se ralentizaban os escritos persoais no correo tradicional (cando chegan as cartas?, canto tardan?, tanto?...). Acostumados á inmediatez da actual tecnoloxía reflexionamos sobre a comunicación a distancia por outros medios.

O CPI de San Sadurniño está na comarca de Ferrol-Terra e é moi parecido ao noso, polo menos en canto ao alumnado. Cartearémonos con unhas 30 persoas de 3º de ESO  e 27 de 4º de ESO, números moi similares nos dous centros (nós somos 27 neses dous cursos). É unha boa ocasión para coñecer xente doutra realidade dialectal diferente (bloque central do galego mentres que Portas pertence ao bloque occidental).


Se todo vai ben contamos acabar esta actividade nunha visita aos concellos correspondentes: que elas e eles nos visiten ao noso centro e contorna e que nós igualmente vaiamos alá.

55 anos de Balbino: nova homenaxe a Neira Vilas e Memorias dun neno labrego

O EDLG en colaboración co Departamento de Lingua Galega, o Equipo da Biblioteca e co club de lectura "As Portadas" continúa coas exposición sobre a obra de Neira Vilas. O pasamento do escritor crucense -hai un par de meses- fixo revivir o interese pola súa obra na comunidade educativa polo que aproveitamos para mercar algunhas obras e promocionar outras que xa se encontraban entre os fondos do noso centro.

No corredor central do primeiro andar colocamos unha exposición sobre o 55 aniversario da publicación de Memorias dun neno labrego. Debuxos de Balbino do noso alumnado, portadas, frases e outros elementos compoñen a base dos murais que mostramos sobre a famosa obra do autor de Gres, en Vila de Cruces.

Ademais fixemos unha exposición de libros na entrada da biblioteca. O autor dezán ten unha serie de títulos entre os máis coñecidos do último medio século da literatura galega: Memorias dun neno labrego, Cartas a Lelo, Querido Tomás, O cabaliño de buxo, Xente no rodicio ou Historias de emigrantes atópanse probablemente están entre as obras que máis soan ás persoas que leron algo en galego no último medio século. Para os que naceron nos últimos tres lustros poida que xa non sexa un referente como foi noutrora para o que hoxe chamamos literatura infantil e xuvenil, pero os seus libros seguen aí, pedindo relelos... E ben que o merecen.